काठमाडौं । रोयल च्यालेनजर्स बेंगलूरुले जारी १७ औं संस्करणको इन्डियन प्रिमियर लिग (आईपीएल) मा लगातार चौथो जित निकालेको छ ।
लगातार चौथो जित निकाल्नेक्रममा बेगलूर्रुले पञ्जाब किंग्सविरुद्ध जित निकाल्दै आईपीएलमा प्लेअफ सम्भावना कायम राखेको छ ।
पञ्जाबको घरेलु मैदान धर्मशालामा भएको खेलमा बेंगलूरुले ६० रनको जित दर्ता गरेको हो ।
बेंगलूरुले दिएको २ सय ४२ रनको लक्ष्य पछ्याएको पञ्जाब १७ ओभरमा १ सय ८१ रनमा अल आउट भयो ।
पञ्जाबका लागि राईली रूस्सोले २७ बलमा ९ चौका र ३ छक्का सहित ६१ रनको अर्धशतकीय ईनिङ खेले । शशांक सिंहले १९ बलमा ३७ रन जोडे । जोनी बेयस्टोले २७ तथा स्याम करनले २२ रन बनाए ।
बेंगलूरुका लागि मोहम्मद सिराजले ३ विकेट तथा स्वप्निल सिंह, लोकी फर्गुसन र करन शर्माले समान २/२ विकेट लिए ।
त्यसअघि टस हारेर पहिले ब्याटिङ गरेको बेंगलूरुले निर्धारित २० ओभरमा ७ विकेटको गुमाएर २ सय ४१ रनको विशाल योगफल खडा गरेको थियो ।
बेंगलूरुका लागि विराट कोहलीले ४७ बलमा ७ चौका र ६ छक्का सहित सर्वाधिक ९२ रन बनाए । रजत पतिदरले २३ बलमा ३ चौका र ६ छक्का सहित ५५ रन जोडे । क्यामरन ग्रीनले २७ बलमा ४६ रन जोडे ।
पञ्जाबका हर्षल पटेलले ३ तथा विधवथ काभेराप्पाले २ विकेट लिए । अर्शदिप सिंह र साम करनले समान १/१ विकेट लिए ।
१२ खेलमा ५ जितका साथ बेंगलूरु सातौं स्थानमा छ । पराजित पञ्जाब १२ खेलमा ८ अंक सहित नवौं स्थानमा छ । यस खेलमा पराजित भएसँगै पञ्जाब आईपीएलको यस संस्करणको लिग चरणबाट बाहिरिने दोस्रो टोली बनेको छ ।
